நேரமில்லை

ஒலிக்கிறது காதுகளில் தாலாட்டு
அம்மா என்றழைக்க நேரமில்லை
எல்லாருடைய எண்களும் கையிலுண்டு
தோழமைக்கு மட்டுமே நேரமில்லை

தோழருடன் என்ன நான் பேசிவிட
என்னவருக்கே என்னிடம் நேரமில்லை
காத்திருக்கும் இந்நிமிட சந்தோஷங்கள் ,
புன்னகைக்க மட்டும்தான் நேரமில்லை

கெஞ்சிடும் கண்களில் நல்லுறக்கம்
தூங்கிவிட மட்டும்தான் நேரமில்லை
இதயம் பொங்கி வரும் வெடித்துவிட
இலேசாக அழுதிட கூடவொரு நேரமில்லை.

ஓட்டமாய் ஓடுகிறேன் எங்கெங்கோ
களைப்படையக் கூட நேரமில்லை
இப்படியா வாழுகிறேன் வாழ்க்கையெல்லாம்?
வாழ மட்டுமொரு நேரமில்லை.

நன்றிக்கடனெல்லாம் கிடக்கட்டும் போ-இன்று
என்னுடைய கனாக்காண நேரமில்லை
ஒவ்வொரு உறவுகளாய் கொன்றுவிட்டேன்
பிணங்களை எரித்தாக வேண்டுமொரு நேரமில்லை!



.