ஆசிரியரே-உங்களுக்கு வணக்கம்

 
அ ஆ இ ஈ ஞானம் தந்த ஆசிரியரே!
மொழி, நோக்கு, புதினம், புதுமை,
படைப்பு, எண்ணிக்கை, அறிவியலாயிரம்
விஞ்ஞானம், இதிகாசம், எல்லாம் அறிய
அறியாமை இருளை அகற்றிய
ஆசிரியரே! உங்களுக்கு வணக்கம்!

கல்லூரி பாடம் கற்று, கணினி பாடம் கற்று
தட்டச்சு, சுருக்கெழுத்து, பணம்,
மனம், குணம், உலகம் எல்லாந்தெரியும்படி
நல்லது-கெட்டது எதெதென்ற நாலும் தெரிய வைத்த
ஆசிரியரே! உங்களுக்கு வணக்கம்!

மாவு, சொட்டை, காளி, சட்டி, சுருட்டை, சுப்பன்
என்றெல்லாம் பெயர் வைத்து,
தினம் தினம் உங்கள் சைக்கிள் பங்க்ச்சராக
தேங்காய் உடைத்து, நீங்கள் பள்ளிக்கு வராத
நாட்களெல்லாம், எங்களுக்கு மகிழ்ச்சி
எங்கள் அறிவை வளர்த்து, "படிச்ச புள்ள"
மதிப்பை எனக்கு கொடுத்த
ஆசிரியரே! உங்களுக்கு வணக்கம்!

நான் முதன் முதலாக "தாதா" "ம்மா" என்றெல்லாம்
தத்துபித்திய போது "எங்க சொல்லு, சொல்லு" என்றும்,
சுவரெல்லாம் கிறுக்கி, பாழாக்கினாலும்
"அழகாக இருக்கு உன்னெழுத்து" என்று,
அகமகிழ்ந்து என் முதல் ஆசிரியர்களான,
அப்பா-அம்மாவே, உங்களுக்கு வணக்கம்!

தமிழ் வளர்த்து, மொழி கொடுத்து,
என் எழுத்து கண்டு அகமகிழ்ந்த
கிருஷ்ணமூர்த்தி ஆசானே!
தமிழை விட உசத்தியில்லை என்பீரே?
உங்கள் உயிர் பறித்த கயிற்றுக்கும்,
காதலுக்கும் என் வணக்கமில்லை.

.