மாற்றியெழுதப்பட்ட நியாயங்கள்

முகம் நக்கி எச்சில் தடவும்
நாய்க்குட்டி எனதில்லையென
அன்பைத் துடைக்குமொருக் கைக்குட்டை

தெருவோர விபத்து
எனதில்லை இரத்தம்
என்றாலும் இதயம்?

இன்னும் இருக்கலாம்
பல உலகங்களைப் பிரசவிக்க
கருக்கலைக்கப்பட்டக் கழிவான
அந்தவொரு உலகம்?

உடைக்கப்பட்ட முட்டையில்
நரம்புக்கோடுகள்
கரையுமொரு உயிர்

அருகருகிருக்கும் வாய்ப்பு
இருக்க வைத்தன அருகில்
என்றாலும் இருப்பு?

என் முதுகெலும்பு உடையுமோசை
கத்தியில் இரத்தம் துடைத்து
கைகுலுக்கிச் சென்ற நட்பு?

ஊனமான ஊமை சொன்ன
வார்த்தைகளின் நெருப்பில்
வெளிச்சத்தின் இடைவெளி

சில முணுமுணுப்புக்களும்
கைத்தட்டல்களும் கொண்ட
அரங்கம் நிறைய வாய்ப்புக்கள்
திரை விலக்கும் நடிகன்

மாற்றியெழுதப்பட்ட
குற்றங்களைச் சுமந்தவன்தான்
அப்-பாவி, நான்?



.