(அறி)முகமற்றது

இரைச்சலிடும் ஈக்களுக்கும்
ஊர்ந்து வரும் புழுக்களுக்கும்
முகரும் நாய்களுக்கும்
உணவாகக் கூடாதது
இது அறிமுகமற்றது
தூர எறிந்து விடாதீர்கள்
பல வருடங்களாய் இருக்கிறது
கர்ப்பநீரின் துர்மணத்தில்
அரூபமாய் ஊறியபடி இருக்கிறது
இது அறிமுகமற்றது
எல்லாவற்றையும் அறிந்து
கொள்ளும் இயல்பில்லை நமக்கு
இது அறிமுகமற்றது
ஒதுக்கிவிடாதீர்கள்
இன்னும் அறியப்படாதும்
தள்ளி விடாதீர்கள்
உணர்வற்றதென்று நம்பிவிட வேண்டாம்
காற்றின் சுழற்சியைக்
ஒருநாள் இது கட்டுப் படுத்தலாம்
துளிர் விட்டு வரும்போது
தன் சின்னக் கரங்கள் கொண்டு
பூமியையே பிளந்து
எங்கிருந்து வந்ததோவென்று
வியக்கும்படி ஆகலாம்
பழத்திலிருந்து பிரிந்துவிட்ட விதை

[Save a Girl Child, one of the most beautiful miracles in life]