ஞான மரம்

இன்று தலைவர் நாற்காலிக்கு
என் பெயரிடப்பட்டிருந்தது

ஆணைகளில் கையொப்பமிடலாம்
எனக்கு விருப்பமானவர்களின்
புன்னகையை இரசிக்கலாம்
எதிர்ப்பவர்களை குற்றவாளியெனலாம்
குற்றவாளிகளுக்கு தண்டனை தரலாம்
புத்தரின் சில சுலோகங்களை ஒப்புவிக்கச் செய்யலாம்
கற்களில் அவற்றை செதுக்கச் செய்யலாம்

செதுக்கிக் கொண்டே இருக்கிறார்கள்
பலவருடங்களாக
சுலோகங்கள் தீரவில்லை இன்னும்
குற்றவாளிகளின் எண்ணிக்கை நீள்கிறது

அடுத்த சுழற்சியில் தலைமையான நாளில்
கற்களைச் செதுக்குவதும் குற்றமென
அறிவித்து, ஆணை எழுதிய
பேனா முனை முறிக்கிறேன்
கருப்பாகவே வழிகிறது இறந்தவர்களின் குருதி

ஞான மரத்தின் கீழமர்ந்து
நகுலா! நீரைத் தேடு!
என்றேதான் மீண்டும் தருமன் அறிவிக்கிறான்