மெளனம்

மெளனத்தையுடைக்கும் முயற்சியில்
குவித்துச் சேர்க்கிறேன் என்னையே
இணையாமலும் பிரியாமலும்
இருக்கிறது மெளனமாக
இன்னும் துண்டு துண்டாகிறது
உடையாமலும் ஒட்டாமலும்
மெளனமாக இருக்கிறது

எளிதாக இருக்கிறது
இன்னுமொரு அடி முன்னே வைப்பதும்
மீண்டும் பின்னால் செல்வதும்
போலவே கடினமாகவே
மௌனமும் இருக்கிறது

சொல்லவியலாத பதில்களும்
நிறமிழந்த சில ஓவியங்களும்
அங்கே புதைந்துள்ளன
தோண்டவேண்டாம்
மௌனமும் இருக்கிறது

அதைக்காட்டிலும் உனக்கான
கேடயம் மேலானது
எனக்கானதை வெளிக்கொணரும்
முயற்சியில் நீ வென்றாலும்
அது தரும் ரணங்களைச் சகிக்கவியலாது
அங்கே மெளனம்தான் புதைந்துள்ளது
மெளனமாகவே மௌனமும் இருக்கிறது